Kryeministri Edi Rama paralajmëroi këtë të Premte një riorganizim të ndërmarrjeve të Ujësjellës-Kanalizimeve.
Në një takim me kryetarë të bashkive, shefi i ekzekutivit tha se situata në menaxhimin e ujësjellësve është katastrofale. Krah Ramës, ishte ministri e Infrastrukturës e Energjisë Belinda Balluku, e cila foli për keqmenaxhim nga ana e drejtuesve të ndërmarrjeve të Ujësjellës-Kanalizimeve.
“Shuma e vënë në dispozicion të transformimit rrënjësor të sektorit të ujit është 1,2 miliardë euro. Ne rrisim investimet, ju rrisni humbjet dhe pastaj janë qytetarët që me të drejtë ankohen. Sepse rritja e investimeve nuk mund të përkthehet me rritje të humbjeve”, u tha Rama.
“Kjo gjendje është në kufijtë e absurditetit ndaj ministra e Energjisë dhe Infrastukturës do ndërhyjë menjëherë për të kthyer tendencën duke ndërtuar një proces ndërveprimi me partnerët dhe me ju, kryetarët e bashkive për të riorganizuar gjithë sistemin me themel dhe cilido që nuk do, duhet të kuptojë që një ndërmarrje ujësjellësi që s’mbulon as pagat që s’mbulon as sigurimet shoqërore është pasqyra më dëshpëruese e papërgjegjshmërisë. Do bëjmë skanim të burimeve njerëzore të ujësjellësve, çfarë profil dhe aftësish menaxheriale kanë drejtorët e ujësjellësve, shefat e ujësjellësve në shqipërim. Sa janë në profilin e tyre punonjësit e ujësjellësve. Sugjerimi im do ishte ti merrni masat vetë para se pasqyrat të tregojnë histori që do mbeten në historinë e humorit e satirës shqiptare”, tha Rama.
“Javën e ardhme ministrja do jetë qark për qark me kryetarët e bashkive. Nxjerrja nga duart e politikës së punësimeve në ujësjellës dhe për këtë do kërkojmë ndihmën dhe mbështetën e partnerëve tanë që të jenë monitorë të burimeve njerëzore se kanë investuar energji, kohë dhe para”, shtoi ai.
Si shembullin më të keq Rama përmendi Bashkinë e Vlorës të drejtuar nga Dritan Leli.
“Bashkia e Vlorës me 78.9 përqind humbje. Ça do me thënë kjo?! Domethënë një kompani e falimentuar si një piramidë që vijon merr para nga shteti dhe si lapidar abuzimi me faktin që uji është jetik dhe s’është një mall që mund të trajtohet si çdo mall tjetër kur vjen puna te domosdoshmëria për ta pasur në familje. Si mund të vijojë kështu kjo histori? Si mundet kjo drejtori ujësjellësish të jetë në punë akoma? Është koha për të vepruar dhe në këtë drejtim siç fola për mbetjet qeveria s’do rri në pozicionin e thjeshtë financuesit, por do përfshihet aktivisht në këto shërbime. S’do lejojmë më që paratë e popullit shqiptar të abuzohen në këtë farë feje nga keqqeverisja ekstreme e këtij sektori dhe vijimësia e inercisë së shpërdorimit të të ardhurave. E para duke paguar njerëz që s’kanë lidhje me punësimin, madje njerëz që s’janë fare në Shqipëri dhe rezultojnë në librat e pagave të ndërmarrjeve prej vitesh e vitesh”, tha Rama.
Bashkinë e Kavajës e solli si një tjetër shembull negativ, teksa tha se ka vetëm 31 përqind arkëtim.
Ai vlerësoi se edhe më të mirët janë në pozitë të disfavorshme dhe këtu sipas Ramës, është qartësisht një problem menaxhimi.
“S’diskutohen as Korça e Pogradeci që janë në një stad tjetër për shkaqe që dihen se kanë pasur shumë më shumë financime, por si paguajnë dot kreditë”, u shpreh.
