Partizani do të luajë ditën e diel kundër Egnatias, një sfidë e lehtë në letër. Gjithashtu, një sfidë ku pritet edhe kthesa e “demave”, pasi ky sezon i ri 2021-’22 nuk ka nisur siç duhet për ta.
Vetëm 4 pikë nga 18 të mundshmet janë pak për një ekip që pretendon vendin e parë në fund të kampionatit. Kështu që, sfida kundër Egnatias është vlerësuar në maksimum dhe të kuqtë po vazhdojnë përgatitjet në seancat stërvitore në vigjilje të këtij takimi.
FORMACIONI – Sërish, grupi për trajnerin Daja nuk është i plotë, pasi Stenio Zhunior do të mungojë për shkak kartonësh, ndërsa Ergys Kaçe ende nuk është rikuperuar 100% nga dëmtimi i tij. Në vend të Zhuniorit, pritet përsëri titullar Filipoviç, ndërsa Cara mund ta nisë nga minuta e parë.
Në mesfushë, pritet treshja Rrapaj, Murataj dhe Mala, ndërsa në mbrojtje, mund të rreshtohen sërish 5 lojtarë. Albion Marku po bën shumë mirë nga krahu i djathtë. Gjithashtu, edhe Musta nga krahu tjetër ka treguar rendiment të mirë. Sa i takon qendrës, Saliou po rritet dita-ditës dhe po tregon maturi, ndërsa Belica e Sota do të kompletojnë repartin. Alban Hoxha në portë dhe lideri i ekipit, me shiritin e kapitenit në krah.
ANALIZA – Stafi teknik i Partizanit ka analizuar edhe ndeshjen derbi me videoanalizë, ku janë vënë në pah gabimet e ekipit, si dhe manovrat pozitive, në mënyrë që skuadra të përgatitet sa më mirë për sfidën e radhës. Kjo analizë ka zgjatur rreth 30 minuta.
