Replikat kanë vijuar këtë të Enjte në Kuvend mes kryeministrit Edi Rama dhe kryetarit të PD-së Lulzim Basha.
Lidhur me vetingun në politikë, Basha i bëri apel Ramës ta votojë, pasi sipas kryetarit të PD-së do të pastrojë llumin në politikë. Rama u shpreh se nisma duhet të diskutohet fillimisht në rang ekspertësh mes dy palëve, e të merret edhe mendimi i partnerëve.
Në replikë, Basha tha vetingu në politikë është në përputhje me rekomandimet e Venecias dhe Rama ka frikë nga nisma.
“Kush do ta aprovojë vetingun në politikë, Rrok Gjoka me Salillarin, Toma, kujt i druhesh, merre ja ku e ke, kaloje. E kë përpara vetingun në politikë, për të gjithë politikanët”, tha Basha.
“Po të them ta bëjë SPAK-u që sipas listës së patronazhistëve të tu, ¾ i ke votuesit e tu”, shtoi Basha.
Kryedemokrati akuzoi kryeministrin se ka vjedhur pasurinë dhe votën e shqiptarëve gjatë qeverisjes së tij, ndërsa drejtësinë e re e akuzoi si të kapur nga Rama.
Basha kujtoi edhe 2011-ën, kur e mundi Ramën në zgjedhjet për bashkinë e Tiranës.
“Një herë të kafshuan dhëmbët e mi u zhduke tre javë si the as partisë ku shkove. Vetëm ti dhe unë e dimë ku shkove nga burime të ndryshme. Ai të dhemb ty bankomati i 2011-ës. S’të del e keqja”, tha Basha.
