Betonieret që mbron Erion Ahmeti “shtypin” kryepolicin Nano

Nga Boldnews.al

Në duart e Gledis Nanos, kreut të ri të Policisë së Shtetit ishte lista e drejtorëve të qarqeve dhe komisariateve në vend. Të gjithëve iu vendosi lapsin e kuq, duke i shkarkuar nga postet e larta që mbanin dhe emëruar në disa sektorë që janë kthyer si vende pune për të “kapur pensionin”. Por ka edhe nga ata që shpëtojnë. Është vetëm një dhe askush tjetër. Shefi i Komisariatit të Policisë Rrugore të Tiranës, Erion Ahmeti, mbeti sërish në detyrë, ndonëse ka katër vite në atë pozicion me disa pezullime nga të “mëdhenjtë” dhe me rikthime po me urdhrin e më të “medhenjve”.

Ditën e sotme të gjashtë shefat e komisariateve në Tiranë u shkarkuan duke u emëruar të rinj, që sipas Nanos do të japim një performancë më të mirë. Thonë që kreu i policisë ka bërë “analizë të thellë” dhe nga thellimi “i madh” arriti në përfundimin se vetem Ahmeti “meriton” të jetë sërish kreu i Policisë Rrugore në Tiranë. Ai ka meritë, pasi atë uniformë e cila paguhet nga taksat qytetare duket se e ka kthyer në veladon për të krijuar lidhjet me krerët e lartë të ministrisë, policisë dhe oligarkisë së ndërtimit. Faktet janë përditë në mes të rrugës…

Po çfarë ndodh me qarkullimin në kryeqytet? Është kthyer në makth lëvizje me makinë në shumë zona të Tiranës, kur mbetesh për orë të zgjatura në trafik. Gjithashtu disa akse rrygore, kryesisht Unaza e Re dhe Bulevardi i Ri, janë kthyer në “pistë garash” të makinëve të tipit të fundit dhe motorëve sportiv. Edhe aksidentet rrugore nuk kanë pësuar ulje, duke mbetur thuajse në të njëjtat shifra nga viti në vit.

LEXO EDHE  Xhaferaj: Rama ka dështuar me rindërtimin

Në shumë raste ka ankesa nga qytetarët për ndëshkim të padrejtë nga efektivët e qarkullimit rrugor dhe sjelle arrogante të tyre. Ahmetaj qëndron sërish aty, duke sfiduar këdo, bashkë me kohën, sepse vetëm ai si prurje e Ardi Veliut, po ia kalon edhe ish-shefit që e emëroi.

Ka një “fuqi madhore” shumë më të madhe se ankesat e mijëra qytetarëve, apo edhe më të madhe edhe se e disa deputetëve të Rilindjes që ankohen për të nën zë, por nuk kanë çfarë të bëjnë, duke ngritur gishtin lart: “e mbron ai…”, sigurisht jo Përëndia! Gjatë kohës së pandemisë kur e gjithë Policia e Shtetit, përfshi edhe ushtrinë doli në rrugë për të penguar çdo makinë të lëvizte, disa e shkelën çdo ligj dhe VKM.

Kamionët e oligarkisë së ndërtimit bridhnin të qeta nëpër Tiranë duke bërë “garë” me aautoambulancat që transportonin të sëmurët me covid. Kjo situatë vijon prej të paktën tre vitesh me mjetet e tonazhit të rëndë të cilat qarkullojnë në çdo orë dhe rrugë të kryeqytetit, duke u kthyer shpesh si shkak i bllokimit të trafikut, ashtu edhe një “kancer lëvizës” nga dioksidi i karbonit që çlirojnë në hapësirë.

Kjo nuk është pak, madje është aq shumë sa nuk ka ku të shkojë “njohja e të mëdhenjve”. Pak ditë më parë në momentin që Nano mori detyrën e kreut të policisë së shtetit Boldnews.al ngriti pikëpyetjen sesi do sillej përballë betonierëve të oligarkisë që mbrohen nga Ahmeti. Koha e tregoi shumë shpejt ku edhe “prurja e re” e ardhur me “bekimin amerikan” dhe me aprovimin në dukje edhe të opozitës, u “shtyp” nga betonieret e oligarkisë së ndërtimit. Kullat le të ngrihen, betonieret të shkojnë përpara…!