Gjykata e Apelit të Tiranës, ka dënuar me 9 vite burg, 38- vjeçaren Violeta Donaj, e cila 3 vite më parë vrau burrin e saj në tregun e Milotit.
Krimi ka ndodhur më 17 qershor 2018, ku Violeta Donaj qëlloi me pistoletë ndaj bashkëshortit të saj Kujtim Donaj.
Nga hetimet rezultoi se fillimisht ka qenë gruaja e cila ka mbërritur në treg me automjetin e saj SMART, ngjyrë e kuqe e errët, me targa AA 389 LR. Pas këtij momenti ajo ka telefonuar bashkëshortit të saj që të vinte te kioska ku ata tregtonin, për të sistemuar mallin.
Në momentin që Kujtim Donaj, 42-vjeç, ka mbërritur pranë vendit të punës, ai është qëlluar me tre plumba pistolete TT, pas shpine nga bashkëshortja e tij. 42-vjeçari ka humbur jetën në vend si pasojë e plagëve të marra. Në vendin e ngjarjes janë gjetur tre gëzhoja plumbi pistolete. Sipas dosjes hetimore, Violeta Donaj pas krimit ka hedhur armën e krimit mbi mallin e një tregtari tjetër aty pranë dhe është larguar në drejtim të autostradës e ndjekur nga kunata e saj.
Në dosjen e akuzës rezulton se autorja, në atë kohë 35-vjeç, ka ecur në këmbë përgjatë autostradës, e shoqëruar nga kunata e saj, bashkëshortja e vëllait, kur edhe janë ndaluar nga patrulla e policisë. Për zbardhjen e këtij krimi janë marrë një sërë dëshmisë mes tyre ajo e tregtarit P.M.
Në vijim të hetimeve, janë marrë në pyetje edhe prindërit e shtetases Violeta Donaj, të cilët janë shprehur se vajza e tyre Violeta nuk u treguar për ndonjë konflikt që ka pasur me bashkëshortin e saj Kujtimin, nuk i kanë parë armë me vete gjatë kohës që ajo ka qenë në shtëpinë e tyre.
