Shtatë persona janë arrestuar në Fier për prodhimi dhe shitje të narkotikëve dhe kultivim të tyre. Po ashtu, është proceduar kryeplaku i fshatit Hamil.
Gjatë kontrollit të ushtruar në fshatin Hamil në stallën në pronësi të personit me inicialet A. H., janë gjetur dhe sekuestruar 60.4 kg kanabis, njoftoi policia.
“Si pasojë u arrestua në flagrancë për veprën penale ‘Prodhimi dhe shitja e narkotikëve’ e kryer në bashkëpunim dhe ‘Kultivimi i bimëve narkotike’ një 42 vjeçar, banues në Hamil, si edhe u arrestuan për veprën penale ‘Prodhimi dhe shitja e narkotikëve’ e kryer në bashkëpunim shtetasit Z. K., 36 vjeç, A. K., 24 vjeçe, F. K., 38 vjeçe, H. K., 60 vjeçe dhe F. K., 34 vjeçe, banues në fshatin Baltëz, të cilët u gjetën në stallën e shtetasit A. H., duke kryer procesin e tharjes së bimëve narkotike. Gjithashtu u procedua penalisht për veprën penale ‘Moskallëzimi i krimit’, kryeplaku i fshatit Hamil, shtetasi S. H., 56 vjeç”, shtuan të njëjtat burime.
Gjatë kontrollit të territorit, po në këtë fshat, në tokën e mbjellë me misër të shtetasit E. H., 39 vjeç, u gjetën të kultivuara bimë narkotike cannabis sativa. Në përfundim të veprimeve, u arrestua në flagrancë shtetasi E. H., 39 vjeç, për veprën penale ‘Kultivimi i bimëve narkotike’, thuhet më tej në njoftimin e policisë.
