Të tjera detaje janë zbardhur nga ngjarja e rëndë e ndodhur mbrëmjen e së shtunës në Fier, ku u ekzekutua me breshëri armësh, biznesmeni Demir Backa.
Nga raportimet mësohet se ndaj biznesmenit është qëlluar me dy lloje armësh, kallashnikov dhe pistoletë, ndërsa ekzekutorët kanë qëlluar me precizion të lartë nga një distancë prej jo më shumë se 10 metrash.
Tre nga plumbat, raportohet se kanë goditur viktimën në pjesën e kokës dhe qafës, ndërsa pjesa tjetër në kraharor. Biznesmeni u transportua në gjendje të rëndë shëndetësore drejt spitalit rajonal të Fierit, ku edhe u deklarua se kishte vdekur.
Policia gjeti në vendin e ngjarjes rreth 16 gëzhoja, edhe pse në trupin e viktimës u gjetën 18 goditje.
Nga policia u shoqëruan pas ngjarjes 15 persona deri tani për t’u marrë në pyetje, por asnjë nuk është arrestuar.
Shpresat janë që përmes kamerave të sigurisë, policia të mundë të ndërtojë një identikit të autorëve, edhe pse thuhet se ata ishin të maskuar.
Ndaj viktimës, që ndodhej në automjetin tip Audi, u qëllua nga një makinë Mercedez, e cila ishte në lëvizje. Automjeti u gjet i djegur në Daullas, bashkë me dy armët që mendohet se u përdorën në krim.
