I kërkuar nga Italia, arrestohet teksa po kalonte drejt Greqisë/ Kush është “sakati”?

I njohur me nofkën “Sakati”, shtetasi Aleksandër Baho, është arrestuar, teksa përpiqej të kalonte drejt Greqisë, për llogari të drejtësisë italiane.

Baho e mori këtë nofkë, pasi i mbijetoi një atentati të mirorganizuar në fshatin Murras në Elbasan, ku humbi jetën vëllai i tij.

Nga raportimet mësohet se Baho u arrestua nga policia teksa po kalonte në drejtim të Greqisë. Pritet që autoritetet italiane të kërkojnë ekstradimin e tij, pasi e akuzojnë për përfshirje në trafik narkiotikësh, në kuadër të një grupi kriminal.

Alkesandër Baho, është një emër i njohur për policinë, madje është konsideruar si krahu i djathtë i Endrit Alibej, i njohur si ‘tarzani’, i ekzekutuar bashkë me xhaxhain dhe një shtetas turk, në atë që njihet si masakra e Bradasheshit në dhjetor të 2018. Pas kësaj ngjarje të rëndë, në shenjëstër u vu vetë Aleksandër (Aldo) Baho.

Atij dhe të vëllait iu bë atentat një ditë pas zgjedhjeve lokale të 30 qershorit në Murras të Elbasanit. Nga breshëria e plumbave gjeti vdekjen Kevin Baho, ndërsa Aleksandri mbeti i plagosur rëndë dhe vuan edhe sot pasojat, për shkak se ecën me paterica.

LEXO EDHE  E njohu në rrjete sociale, gruaja denoncon burrin: Më premtoi se do të martoheshim, më gënjeu

Vëllezërit Baho sipas policisë ishin në shenjëstër te një grupi të fuqishëm kriminal për shkak të lidhjes me klanin Alibej.

Së fundmi, Erjon Alibej është arrestuar, si urdhërues i vrasjeve të Emiljano Ramazanit dhe Regis Runajt, të cilët i dyshonte për përfshirje në vrasjen e të vëllait. Grupi krimninal i drejtuar fillimisht nga Endrit Alibej e më pas nga i vëllai, Erjoni është goditur nga kundërshtarët, për shkak se personat e lidhur me ta, janë ekzekutuar. Në bruksel u qëllua për vdekje, Arjan Spahiu, i njohur si Arjani i vogël, e më vonë në Elbasan, Everest Cakaj.