Delegacionet e Kosovës dhe Serbisë zhvilluan raundin e parë të negociatave në Bruksel për gjetjen e një zgjidhjeje përfundimtare për çështjen e targave.
Përfaqësuesi i Bashkimit Europian për dialogun, Miroslav Lajçak, publikoi një mesazh dhe një fotografi të palëve në tryezë.
“Grupi i kryesuar nga këshilltarët e mi do të takohet rregullisht. Unë besoj se ata do të paraqesin gjetje konkrete në 6 muaj”, shkruan zyrtari europian në rrjetin social Twitter.
Takimi i parë erdhi pas marrëveshjes së 30 shtatorit në Bruksel, me të cilën Kosova dhe Serbia i dhanë fund tensioneve në dy pikat kufitare të Jarinjës dhe Bërnjakut që erdhën nga vendosja e reciprocitetit për targat. Aktualisht, në këto pika kalohet vetëm duke mbuluar simbolet shtetërore me letër ngjitës.
