Kryeministri Edi Rama deklaroi këtë të Mërkurë se “është krenar për patronazhistët”. Në një konferencë për gazetarët një ditë pas progres-raportit të BE-së që e cilësoi “shqetësuese” çështjen e rrjedhjes së të dhënave personale, kreu i qeverisë nuk ndryshoi qëndrim për rastin.
Në progres-raport thuhet se “shqetësimet mbetën të lidhura me keqpërdorimin e burimeve publike ose funksioneve zyrtare, akuzat për blerjen e votave dhe rrjedhjen e të dhënave personale të ndjeshme, që zbulojnë preferencat politike të qytetarëve. Këto raste janë duke u hetuar”.
I pyetur nga gazetarët për çështjen, Rama tha se për patronazhistët “jam dhe më krenar seç isha para zgjedhjeve se pa ta s’do ishim një makineri e pathyeshme, por do të ishim një foltore”.
“Raporti flet për pretendime që po hetohen dhe natyrisht të hetohen deri në fund”, shtoi ai.
Kreu i qeverisë tha se karta e identitetit e shtetasve shqiptarë, ndryshe nga ajo e qytetarëve në vendet e BE-së, nuk përmban të dhëna sensitive.
“Karta jonë është një kartë që s’ka brenda asnjë me një numër që s’do të thotë asgjë. Kartat kanë qenë në internet prej vitesh ato s’janë të vlefshme e s’kanë asnjë lloj peshe në punën e patronazhistëve. Ç’duhet numri i kartës?! Këto janë çështje që të hetohen deri në fund”, shtoi ai.
