Të hënën luhet derbi i kryeqytetit mes Tiranës dhe Partizanit e, normalisht, të dyja ekipet duan që të kenë në dispozicion kontigjentin e plotë për këtë sfidë kaq të rëndësishme. Situata te Partizani nga fillimi i sezonit ka qenë optimale sa u takon dëmtimeve, pasi titullarët kanë qenë të gatshëm për çdo sfidë të Superiores deri më tani.
Partizanit nuk i kanë munguar alternativat në 5 javët e para të kampionatit, por i ka munguar fitorja. E pikërisht, në derbi shpresojnë që ta kalojnë dhe këtë ngërç sa i takon rezultatit e të marrin fitoren e shumëpritur.
Nëse te Partizani ka një lajm të mirë për mbrojtjen me rikthimin e Shehit, lajmi i keq vjen në sulm, aty ku “demat” do të kenë një alternativë më pak. Sulmuesi brazilian, Lucas Cardozo, pësoi një dëmtim në shpatull në sfidën kundër Kukësit dhe e kishte të pamundur për të vazhduar, duke u zëvendësuar pas vetëm 14 minutash lojë. Mësohet se braziliani ka nxjerrë shpatullën dhe i duhet rreth 1 muaj rikuperim, çka do të thotë se i ka humbur sfidat e radhës për të kuqtë.
Cardozo ka qenë titullar për Partizanin në këtë fillim sezoni, por së fundmi e humbi disi vendin e tij në formacion, me Dajën që ka vendosur të luajë me vetëm dy sulmues, duke aktivizuar Carën dhe Juniorin. Alternativë është dhe Filipoviç, me kroatin që ende po pret shansin e tij për të treguar potencialin në fushën e lojës.
24-vjeçari ka luajtur vetëm në Kupë si titullar përballë Tërbunit, duke shënuar 2 gola, ndërsa në kampionat, ende nuk i është besuar një vend në formacion. Madje, në sfidën kundër Kukësit nuk u aktivizua as nga stoli, kur ndeshja ishte në barazim 1-1 dhe Partizani ishte në ndjekje të një goli fitoreje.
