Policia belge arrestoi 27 persona, shumica e të cilëve shqiptarë, që dyshohet se ishin pjesë e një organizate të trafikut të kokainës. Sipas gazetës ‘De Standaard’, të arrestuarit dyshohet se kanë importuar kokainë në sasi të mëdha.
Pjesëmarrës në organizatë kishte edhe kolumbianë, ndërsa dyshohet se ata vepronin në rajonin e Liege.
Rrjeti i drogës ishte aktiv edhe në Spanjë dhe Holandë.
Në operacionin për goditjen e kësaj bande morën pjesë 300 oficerë policie. Mediat belge shkruajnë se janë sekuestruar 1.9 ton kokainë, 10 armë zjarri (mes tyre 5 kallashnikovë), 80 mijë euro në cash, kuaj dhe mallra të ndryshëm luksi.
Gjithashtu është bllokuar edhe një laborator për përpunimin e kokainës. Një nga magazinat ku ruhej droga ruhej nga një person me mitraloz.
Hetimet për bandën nisën 3 vjet më parë. Rrjeti u zbulua pasi dekodimeve të mesazheve të kriptuara. Mes të tjerash raportohet se rrjeti ka importuar të paktën 15 ton kokainë gjatë muajve të fundit përmes porteve të Roterdamit dhe Antverpës.
Kokaina vinte në tekstile të ndryshme si peshqirë dhe rroba, të cilat laheshin më pas për të nxjerrë kokainën e kristalizuar. Kjo punë kryhej nga disa kolumbianë të specializuar.
