Sateliti presh i Rilindjes dhe fshati oligarkik

Nga Boldnews.al

Kemi ecur shumë në tetë vite qeverisje të Ramës. Fshatari jeton në një vilë luksoze, ku nuk ka as baltë, as lopë, bajga jo e jo, por vetëm aromë lulesh, makina të tipeve të fundit dhe roje private. Kush është fshati shqiptar për Rilindjen? Vila që blihen nga “fshatarët” për 500-700 mijë euro, me rrugë të shtruara, nën ndriçim të bollshëm dhe që ruhet nga roja private. Në fshat lëvizin automjetet më të shtrenjta, prej tyre zbresin “fshatarët të pasur”, gra të stolisura në ar dhe parfumosura. Ky është fshati shqiptar për qeverisjen e sotme, duke e përfshirë këtë citat absurd dhe manipulative në librat e fëmijëve të klasave të katërta. Koncepti fshat për qeverinë e Ramës është “rezidenca e Samir Manes”.

E tashmë kur kemi arritur ta bëjmë fshatin të tillë, mirëqenia na e lejon që vitin e ardhshëm të nisim drejt orbitës dy satelitë, që do të kenë pamjen e preshit për të fluturuar mijëra kilometra… Po fshati i vërtetë është tërsisht tjetër. Aty mund të ketë rrugë të shtruara me asfalt pak milimetra që e bren koha për pak muaj, por shpesh nuk ka ujë të pijshëm apo vaditës. Tokat qëndrojnë djerr pasi është shtrenjtuar kosto e punimit, frezimit dhe mbjelljes. Edhe në ato zona ku kultivohen produkte bujqësore shpesh detyrohen ti hedhin prodhimet, ose në rastin më të keq, u del farë e keqe që futet në treg nga “fara e keqe” e tregtarëve të lidhur me pushtetin dhe askush nuk i penalizon.

LEXO EDHE  Vokshi: Dhuna në familje po kap shifrat e një pandemie, qeveria ka dështuar të mbrojë gratë e fëmijët

Fshatari i sotëm nuk është ai që lexohet në librat shkollorë, nuk zbret nga mjetet e luksit, por hedh djersën me kazëm në duar në një arë që e punon gati si në mesjetë. Banorja e fshatit nuk është ajo gruaja që shëtit në “fshatin e Rilindjes” e parfumosur, por një zonjë e vuajtuar që duart janë plot kallo dhe të cjerra nga puna e rëndë.

Për atë fshatarin e vërtetë qeveritë kujtohen për tu marrë votën, me një thes të madh premtimesh që nuk realizohen kurrë, paçka se koha shkon e shkon pafund. Fermeri shqiptar nuk merr subvension, pasi edhe atë para që hidhet për bujqësinë e thithin oligarkët që kanë shtrirë aktivitetin edhe në zonat rurale.

Në fshat aktualisht është stina e preshit. Ka shumë në treg, vjen nga Divjaka, Kavaja, Kashari e ndonjë vend tjetër. Ky është produkti i stinës, këtë shet fshatari i vërtetë sot, por për qeverinë “fshatari” është ai që jeton në vilat luksoze të ndërtuara nga Samir Mane në periferi të Tiranës.

E sikur të mos mjaftojë ironia therëse dhe propaganda që mban erë bajgë, Rilindja na ka çuar në një tjetër dimension. Vitin që vjen Rama premtoi se do të dërgojë dy satelitë në orbitë, duke u vendosur edhe emrin: Albania 1 dhe Albania 2. Këto satelitë mund të kenë formën e preshit të Kasharit që fluturon larg e më larg në thellësinë e hapësirës së pafundme. Edhe qeveria fluturon fluturon bashkë me të…!