Verona po bëhej gati të festonte rezultatin dhe thyerjen e një tabuje, por për fatin e keq të Igor Tudorit përfundimi i buzëqeshi Polit që rishkroi historinë duke regjistruar një rekord pikësh te Milani që kur fitorja në Serinë A vlen 3 pikë. Praktikisht 22 pikë në 8 ndeshje diçka që as ekipi që u shpall për herë të fundit kampion s’e kishte bërë. Në selinë e klubit nuk i kanë qejf krahasimet e nuk duan t’i shtojnë presion një skuadre e cila po flet qartë me statistika e paraqitje.
Suksesi ndaj Veronës bën që ekipi të ruajë ritmin duke u ndërgjegjësuar për vlerën e saj në një moment kur çdo ditë i lind një problem i ri, sidomos në javën e fundit.
Për pikët e plota ndikon barazimi ndaj Juves, por edhe në atë ndeshje kuqezinjtë treguan një forcë reagimi që mund t’i hyjë shumë në punë nesër në Champions ndaj Portos kur Ibra me shokë do të kërkojnë pikët e para në këtë kompeticion.
22 pikë nga 24 të mundshme janë një rekord në historinë e klubit, ndërkohë që nuk duhet harruar se asnjë nga rivalet nuk ka pasur të bëjë me kaq shumë mungesa sa “Djalli”. Të shtunën formacionit i mungonin disa titullarë (Menja, Hernandez e Diaz për dëmtime dhe Kjer, Tonali e Ibra për zgjedhje taktike). Pavarësisht situatës, trajneri dhe lojtarët ditën të korrigjojnë gjithçka e të arrijnë maksimumin me mundësitë që patën. Falë forcës kolektive, mungesat e mësipërme, përfshirë edhe atë të Ibrës kur nuk ka qenë i disponueshëm, kanë filluar të konsiderohen si aspekte normale aq sa Pioli nuk e sheh situatën e dëmtimeve si mallkim apo çështje tersi.
Nëse golat nuk ishin rastësi, diçka e tillë mund të thuhet edhe për autogolin e Gunterit. Duket si gafë, por presioni që ushtrojnë Ibra e Giroud në zonë një mbrojtës e ndjen dhe është më e lehtë që të gabojë. Këtë te Milani e dinë mirë dhe e shfrytëzuan, teksa shpresojnë që nesër ndaj Portos të jenë po aq vendimtarë.
