Opozitë pupël e ka cilësuar ish-Kryeministri Sali Berisha atë që Partia Demokratike nën drejtimin e Lulzim Bashës i ka bërë qeverisë së Edi Ramës.
Berisha akuzoi Bashën se i legjitimoi karrigen Edi Ramës për të mbrojtur karrigen e tij, duke mos bërë asnjë përpjekje për të denoncuar atë që e konsideroi si masakër elektorale.
“Lulzim Basha ka mbështetjen e 19 % të votuesve të PD dhe me një lider të tillë nuk mund të fitonim. Edi Rama nuk i ka marrë kurrë 74 mandate, por ne nuk e mbrojtëm dot votën.
PD i ka një borxh shqiptarëve pasi nuk arriti ti ngjallte besimin atyre te kjo forcë politike. Unë po takon me dhjetra anëtarë dhe drejtues të PD që më tregojnë se Lulzim Basha nuk i takon, nuk i dëgjon.
Ne u ringritëm në 1997, tani do ringrihemi edhe më shpejt edhe më të fuqishëm. Tani i kemi gjërat e qarta se çfarë duhet të bëjmë. Pse fituam në 2005? Fituam sepse u bashkuam”, tha Berisha. Ndërsa foli për një hapje të PD, Berisha vuri theksin në demokratizimin e Partisë Demokratike duke vendosur votën në themelin e saj.
“Nuk duhet të krijojmë struktura moniste të pavlera, do ti japim fund kësaj situate. Se kush do të jetë deputet dhe këshilltar, do e vendosni ju me primaret”, tha Berisha.
