Pas mbledhjes së kryesisë së PS-së, kryeministri Edi Rama u shpreh se në këtë mbledhje është diskutuar lidhur me rezultatet dhe analizën e secilës qendër e anëtar.
Rama është pyetur edhe për ankesat e PS-së lidhur me punësimet në Shkodër, ku sipas tyre, vendet e punës po merren nga partia e Tom Doshit.
Rama u përgjigj se nuk merret me thashetheme të dala rrugëve, duke shtuar se deputetët nuk janë zyra pune dhe as punëdhënës.
“Unë nuk hyj në thashetheme që dalin rrugëve dhe marrin forma të ndryshme, nga mbledhje që mund të kenë një përmbajtje tjetër. Deputetët janë aty për t’i shërbyer popullit dhe qytetarëve. Ata janë aty për të çuar mesazhet e nevojshme dhe për të sjellë në grupin parlamentar dhe veshët e qeverisë shqetësimet e njerëzve. Deputet nuk janë punëdhënës dhe as zyra puna. Proceset se si organizohet puna e shtetit dhe si bëhen rekrutimet në administratë janë procese që rregullohen nga ligjet e shtetit dhe nuk është punë e deputetëve”, tha Rama.
