“Transparencë dhe konkurrencë të ndershme në ekonomi”. Ishte kjo thirrja që iu bë Qeverisë në Asamblenë e 21 të Dhomës Amerikane të Tregtisë, ku veç anëtarëve, morën pjesë ambasadorja e SHBA-së, Yuri Kim, dhe ministrja e Financave dhe Ekonomisë, Delina Ibrahimaj.
Presidenti i Dhomës, Enio Jaço, pohoi shqetësimin dhe pakënaqësitë në rritje të biznesit në lidhje me politikat e brendshme të vendit: “Ka një shqetësim të anëtarëve tanë me ato që ne po përjetojmë sot. Është indeksi i biznesit. Indeksi i biznesit është “check-up”-i ynë vjetor dhe ne besojmë se disa gjëra në ambientin e “Doing Business” nuk janë të drejta”.
Ambasadorja amerikane ritheksoi se përparësitë amerikane në Shqipëri janë demokracia, mbrojtja dhe biznesi: “Ne i bëjmë thirrje qeverisë shqiptare t’i japë përparësi përmirësimit të klimës së biznesit për të zhbllokuar me të vërtetë potencialin që ekziston këtu. Reforma në Drejtësi duhet çuar deri në fund, në mënyrë që gjykatat të jenë të pastra, të drejtat e pronës duhet të trajtohen një herë e mirë sa më shpejt të jetë e mundur dhe konkurrenca e ndershme duhet të jetë parësore në mënyrë që të gjithë investitorët, të mëdhenj apo të vegjël, shqiptarë apo të huaj, të luajnë me të njëjtat rregulla, të drejta dhe transparente”.
Ministrja Ibrahimaj, teksa u zotua se vendi ynë do të fokusohet në përmirësimin e klimës së biznesit, pranoi se ka ende punë kundër luftës së pastrimit të parave dhe të korrupsionit.
Por, sipas Asamblesë së Dhomës Amerikane të Tregtisë do të duhen 40 ndërhyrje ligjore për përmirësimin e klimës së biznesit, teksa bëri thirrje për të punuar bashkë me Qeverinë dhe forcat politike në Komisionet Parlamentare për implementimin e një pakete të tillë.
