Deputeti demokrat Oerd Bylykbashi tha mbrëmjen e sotme se vendimet strategjike që u morën para zgjedhjeve na çuan në humbjen e 25 prillit.
Në emisionin “Çim Peka Live”, Bylykbashi tha se pavarësisht asaj që thuhet për masakër elektorale, sërisht humbja është humbje dhe ne nga 25 prilli dolëm të humbur.
Bylykbashi tha se Lulzim Basha nuk mund të drejtojë partinë me një dorë të hekurt, pasi ne kemi një statut.
“Basha mund të zgjedhë të drejtojë me dorë të hekurt, sepse mund të thotë se kam mijëra vota anëtarësh që më zgjodhën, por së pari duhet të hedhë poshtë statutin.
Një kryetar partie duhet të thërrasë organet qendrore për vendimmarrjen”, tha Bylykbashi.
Ai tha se nuk mund të merren vendime që rrezikojnë thyerje apo çarje në bazën e PD-së.
“Zgjedhjet fitohen me vota, duhen numra të mëdhenj. Ne kemi 620 mijë vota, na duhen për të fituar 750 mijë vota, atëherë si mund ti gjejmë ne 130 mijë vota duke zvogëluar bazën e mbështetësve tanë”, tha Bylykbashi.
