SPAK ka dorëzuar në Gjykatën e Posaçme Kundër Krimit të Organizuar dhe Korrupsionit, kërkesën ndaj ish-drejtorit të Përgjithshëm të RTSH-së, Thoma Gëllçi, dhe tre ish vartësit e tij, që pritet të dalin para GJKKO për rikonfirmimin e pmasës së sigurisë.
SPAK përfaqësohet nga prokurorja Dolores Musabelliu, e cila edhe në kërkesën depozituar në GJKKO i qëndron masës së “Arrestit me burg”, e vendosur paraprakisht.
GJKKO pritet të zhvillojë seancën ditën e hënë, ndërsa Gëllçi dhe 3 punonjës të RTSH, u arrestuan nga Policia e Shtetit.
Më 5 tetor prokuroria e SPAK, i kërkoi GJKKO-së vendosjen e masës arrest me burg ndaj ish zyrtarëve, pasi nga përgjimet e kryera, kishte marrë indicie që 4 të arrestuarit që akuzohen se kanë abuzuar me tenderin e kanalit RTSH Agro, mund të dilnin jashtë shqipërisë.
Gjyqtarja Flora Haradinaj firmosi urdhër arrestet të cilat u ekzekutuan pasditen e 7 tetorit.
Sipas SPAK, Gëllçi ka shpallur procedurën e tenderit përpara se të merrte miratimin nga AMA dhe Bordi për hapjen e kanalit TVSH AGRO. Në tenderin për blerjen e pajisjeve si kamera dhe tjera, kanë qenë dy kompani EURO Contact dhe TBS 96. Anëtarët e KVO kanë shpallur TBS 96 fituese edhe pse kishte ofertë 20 mln më të lartë.
Referuar dosjes, të dyja kompanitë kanë pasur parregullsi në dokumentacion dhe duheshin skualifikuar. Dy ditë më parë me urdhër të SPAK u arrestua ish-drejtori i RTSH-së Thoma Gëllçi dhe 3 bashkëpunëtorë të tij.
Së bashku me Gëllçin, SPAK urdhëroi arrestimin edhe të 3 anëtarëve të Komisionit të Vlerësimit të Ofertave, Ervin Muraj, Alban Malaveci dhe Julian Tapia.
