Babë e bir janë plagosur me thikë në fshatin Mavrovë të Selenicës këtë të Shtunë. Raportohet se ata janë jashtë rrezikut për jetën.
Dyshimet e policisë janë se të plagosurit janë qëlluar nga persona që kishin shkuar për të vjedhur në banesën e tyre.
Pranë vendbanimit të të plagosurve, efektivët kanë konstatuar bimë narkotike, ndërsa në shtëpi dy armë zjarri pa leje. Në këto kushte, policia ka vënë nën arrest të plagosurit.
Plagosja
“Rreth orës 04:55, në spitalin e Vlorës, kanë shkuar të dëmtuar, dyshohet me mjete prerëse, shtetasit F.D., 31 vjeç, dhe V.D., 60 vjeç, (babë e bir), të dy banues në fshatin Mavrovë, Selenicë, të cilët ndodhet nën kujdesin e mjekëve, jashtë rrezikut për jetën. Nga veprimet e para hetimore, rezulton se janë konfliktuar me tre persona ende të paidentifikuar, të cilët dyshohet se kishin shkuar për të vjedhur, dhe në afërsi të stanit janë diktuar nga babai dhe djali, të cilët kanë hasur në rezistencën e tyre, ku si pasojë dhe janë dëmtuar”, njoftoi policia.
Drogë pranë banesës
“Nga shërbimet policore, gjatë kontrollit dhe krehjes së zonës, janë konstatuar të kultivuara 180 bimë narkotike, të cilat janë asgjësuar me anë të djegies. Dyshohet se bimët narkotike janë kultivuar nga shtetasit F.D dhe V.D, të cilëve gjatë kontrollit të banesës ju janë gjetur dhe sekuestruar 2 armë zjarri (automatik dhe pushkë)”, shtuan të njëjtat burime.
Grupi hetimor nën drejtimin e Prokurorisë vijon punën për sqarimin e rrethanave të ngjarjes, sigurimin e çdo prove që do ti shërbejnë zbardhjes së ngjarjes, ndërsa vijon krehja e zonës me qëllim kapjen e autorëve, thuhet më tej në njoftimin e bluve.
