Ardi Veliu është shkarkuar nga posti i Drejtorit të Përgjithshëm të Policisë së Shtetit. Lajmi u raportua në media këtë të Martë duke cituar “burime kofidenciale”, ndërkohë që ende nuk ka një konfirmim zyrtar.
Lidhur me zhvillimin, një reagim të detyruar bëri dhe ministri i Brendshëm Bledi Çuçi. Ky i fundit ndodhej në komisionin parlamentar të sigurisë, kur u pyet nga deputeti demokrat Luan Baçi, nëse Veliu është shkarkuar nga detyra. Ministri, megjithatë, as nuk e pohoi e as nuk e mohoi lajmin.
“Përfitoj nga rasti meqë kemi Ministrin e Brendshëm. Qarkullon në media një lajm për shkarkimin e Drejtorit të Përgjithshëm të Policisë. Jemi shumë të interesuar ta dimë apo jo”, pyeti Baçi.
“Do e merrni vesh në momentin e duhur, kur t’i mbarojë apo jo kandili”, iu përgjigj Çuçi.
Në media, megjithatë, kanë qarkulluar edhe emrat që mund të zëvendësojnë Veliun në krye të Policisë së Shtetit. Një prej tyre është Gledis Nano, i është në postin e Drejtorit të Antiterrorit në Policinë e Shtetit. Një tjetër emër që qarkullon si zëvendësues i Ardi Veliut është kreu aktual i SHÇBA, Muhamet Rrumbullaku. Ardian Çipa, Përgjegjës Departamenti në Drejtorinë e Formimit të Vazhdueshëm, në Fakultetin e Sigurisë dhe Hetimit në Akademinë e Sigurisë është një tjetër emër i lakuar. Po ashtu edhe Ervin Hoxha, ish-drejtues i Policisë Rrugore.
Në Shkurt 2018, Ardi Veliu u emërua drejtori i Policisë së Shtetit duke zëvendësuar Haki Çakon. Veliu, që mbante postin e drejtuesit të Policisë së Tiranës, erdhi në krye të Policisë së Shtetit me propozimin e ministrit të Brendshëm të sapoemëruar të asaj kohe, Fatmir Xhafaj.
