Ish-zv. ministri i Energjisë, Enno Bozdo, në një intervistë në Syri Tv reagoi për rritjen e çmimit të energjisë nga ana e qeverisë, pas paralajmërimit të Kryeministrit Edi Rama se vendi mund të përballet me një krizë energjitike.
Bozdo thekson se Rama po tremb popullatën në lidhje me këtë që po bën, duke shtuar se po goditen më së shumti shtresat në nevojë.
“Rritja e çmimit të energjisë do godasë shtresat në nevojë. Rama po tremb popullatën. Rama futi në panik popullatën, e kjo ka ndodhur në kohën pas tërmetit dhe pandemisë.
Rama po e bën këtë gjë, në emër të raporteve, sipas tij, ndërkombëtare. Ne paguajmë energji më shumë se çdo vend në rajon, përpos Malit të Zi, që ka tjetër standard jetese. Rama të jetë transparent me koncesionet.
Të bëjë transparencën njëherë e pastaj të bëjë këtë gjë që po bën. Shqipëria nuk operon me gaz. Sa i përket asaj që po ndodh në PD, mund të them se Partia Demokratike meriton lëvizje politike opozitare. Basha ka sjellë shterim tashmë për të sjellë PD-në në fitore.
Kjo ka ndodhur edhe para se Berisha të ishte në këtë pozicion, shpallur pra non grata nga SHBA. PD është shkëputur fatkeqësisht nga shoqëria shqiptare. Uroj që Berisha të ndihmojë PD-në që të ngjizet sërish”, u shpreh Bozdo.
