Në kompleksin “Tropikal”, ajo që është tashmë shndërruar shtëpia e kombëtares kuqezi, sa herë që kjo e fundit grumbullohet, skuadra e drejtuar nga Edy Reja ka zhvilluar seancën e parë stërvitore.
Një seancë aspak ngarkuese fizikisht për futbollistët, do të jetë e para e shumë të tillave në 4 ditë grumbullim, teksa grupi i lojtarëve që janë thirrur nga trajneri italian është pothuajse i kompletuar.
Një pjesë e mirë e lojtarëve janë bashkuar në 2 orët e fundit me skuadrën dhe Keidi Bare do të jetë lojtari i fundit që do të mbërrijë në Tropikal gjatë mbrëmjes e gjithsesi Reja ka një problem me vetëm njërin nga ata që ka thirrur.
Siç mësohet, Ardian Ismajli ka probleme fizike dhe do të vlerësohet këto ditë nga Reja, nëse mund të rikuperohet dhe të jetë i aftë të luajë këto dy ndeshje apo të mbahet për të patur shanse vetëm në sfidën e fundit.
Ekziston edhe mundësia që Ismajli të mos ketë kohën e duhur për t’u riaftësuar dhe të rikthehet te Empoli para kohe.
