Një 27-vjeçar është goditur me sopatë në një fshat të Gramshit të Premten. Ai ndodhet në spital, ku po merr mjekim nga dëmtimet e pësuara, ndërsa autori është arrestuar.
“Më datë 01.10.2021, Policia ka marrë njoftim se në fshatin Vinë, Gramsh, gjatë një konflikti për motive të dobëta, shtetasi G. T., 35 vjeç, kishte plagosur me mjet prerës (sopat), shtetasin T.B., 27 vjeç, i cili ndodhet nën kujdesin e mjekëve. Shërbimet e Policisë, shkuan menjëherë në vendin e ngjarjes, ku bënë të mundur kapjen dhe shoqërimin në Komisariat të autorit të dyshuar të ngjarjes”, njoftoi polica lokale.
Në përfundim të veprimeve, shtetasi G.T., 35 vjeç, banues në fshatin Kishtë, Gramsh, u arrestua në flagrancë për veprën penale “Plagosja e rëndë me dashje”, shtuan të njëjtat burime.
