Dy vëllezër janë arrestuar nga policia e Lushnjes pasi në banesë u janë gjetur hashash dhe një granatë dore.
Policia njoftoi këtë të Premte se bazuar në informacione të marra në rrugë policore, nga shërbimet e Komisariatit të Policisë Lushnjë, u finalizua me sukses operacioni policor i koduar “Pushimi” në kuadër të të cilit u arrestuan në flagrancë shtetasit:
O.Ç., 25 vjeç dhe V.Ç., 16 vjeç, banues në fshatin Fier i Ri, Lushnjë (vëllezër).
Të njëjtat burime shtuan se gjatë kontrollit të banesës së këtyre shtetasve, u gjetën dhe u sekuestruan në cilësinë e provës materiale 6.8 kg lëndë narkotike cannabis sativa, një pjesë e të cilës ishte e ndarë në doza gati për shitje, një peshore elektronike që shërbente për ndarjen e lëndës narkotike në doza, një granatë difensive me detonator të montuar, një bajonetë arme zjarri, një përforcues grushti, dy aparate celularë dhe një automjet tip “BMW”.
