Agjencia amerikane e barnave pritet të vendosë për vaksinimin e fëmijëve 5 deri 11 vjeç.
Kompania, Pfizer, dhe simotra gjermane, BioNTech, njoftuan se në testet laboratorike vaksinat anti-covid kanë treguar efikasitet të lartë te të miturit, ndaj është kërkuar përdorimi urgjent i tyre edhe për moshat e vogla.
Albert Burla, shefi ekzekutiv i Pfizer-it, tha se FDA-ja mund ta marrë vendimin që para Krishtlindjeve.
Nëse miratohet për përdorim, janë rreth 28 milionë fëmijë amerikanë të moshave 5 deri 11 vjeç që do të imunizoheshin ndaj sëmundjes infektive.
Një sondazh i muajit të kaluar tregoi se 26 për qind e prindërve me fëmijë të këtyre moshave do i vaksinonin menjëherë ata; 40 për qind do të prisnin sa efikase është vaksina dhe 25 për qind nuk do zgjidhnin t’i vaksinonin.
Fëmijët amerikanë të moshave 12 vjeç e sipër janë lejuar ta marrin vaksinën prej muajit maj, por më pak se gjysma janë të imunizuar deri më sot.
Pfizer-BioNTech planifikojnë t’i paraqitin kërkesë edhe Agjencisë Europiane të Barnave.
Fëmijët i kalojnë më lehtë simptomat e koronavirusit.
Të dhënat nga viti i parë i pandemisë në Angli zbulojnë se 1 në 50 mijë fëmijë nën 18 vjeç përfunduan në spital me simptomat e sëmundjes, ndërsa 2 vdekje në 1 milion raste ishte rreziku absolut i mortalitetit nga infeksioni.
