Partia Demokratike ka kërkuar informacion nga Autoriteti i Konkurrencës lidhur me rritjen e çmimit të bukës.
Në komisionin parlamentar të ekonomisë, deputetja demokrate Jorida Tabaku kërkoi prezencën e përfaqësuesve të Autoritetit të Konkurrencës. Tabaku tha se Autoriteti i Konkurrencës duhet të raportojë në Komision se pse është rritur çmimi i miellit, që pasoi dhe rritjen e çmimit të bukës.
Ajo kërkoi hetim dhe marrjen e masave nga ky institucion.
Rreth dy javë më parë, furrat në vend rritën me 10 lekë çmimin e bukës, duke shpjeguar se ndryshimi i çmimit erdhi pas rritjes së çmimit të miellit.
Autoriteti i Konkurrencës njoftoi se kishte nisur një hetim pasi disa prodhues të miellit rritën çmimin e produktit në të njëjtën kohë, duke krijuar dyshime për një marrëveshje të fshehtë të ndaluar nga ligji.
