Kryeministri Edi Rama tha mbrëmjen e sotme në emisionin “Open” se vendimi i DASH për të shpallur “non grata” ish-Kryeministrin Sali Berisha nuk është rezultat i asnjë lobimi, apo ndikimi nga George Soros.
Ndërsa pohoi se George Soros e ka një mik, sikundër ka mik edhe Viktor Orban apo Erdoganin, Rama tha se “deklarimet se vendimi ka ardhur me ndikimin e Soros në DASH janë përralla, që nuk mund të besohen as nga fëmijët”.
“Të thuash sot se DASH merr vendime me ndikimin apo lobimin e disa grupimeve është absurde. Nëse në SHBA vendimet do merreshin me lobime, atëhere nuk do ishte kjo superfuqi që është sot, por do ishte si puna jonë”, tha Rama.
Ai u shpreh se DASH ka marrë vendimin mbi prova dhe faktet dhe provat dhe faktet janë aty.
“Të thuash se Soros kishte plan të ndante Kosovën, por e shpëtoi Saliu, është një përrallë me mbret, nga ato përrallat që as fëmijët nuk i besojnë”, tha Rama.
Kryeministri ka pohuar se Soros ka financuar ekspertët ndërkombëtarë që erdhën pranë Komisionit për Reformën në Drejtësi, sikundër kanë ndihmuar Shqipërinë dhe shumë vende të tjera.
“Shoqëria e Hapur mbështet linjat liberale, është më pranë tyre, ndaj dhe koservatorët apo të djathtët sulmojnë Soros.
Unë personalisht nuk kam përfituar aspak politikisht nga Soros”, tha Rama.
Kryeministri tha se vendimet për shpalljet non grata janë vendime morale. “SHBA nuk erdhi me thika për të thënë përjashtoni Saliun nga Grupi apo nga Partia, kjo është çështje morali”, tha Rama.
