Situata është tensionuar në veri të Kosovës me serbët të cilët nuk pranojnë reciprocitetin me targat e automjeve të vendosura nga Prishtina zyrtare.
Mediat në Kosovë raportojnë se qendra e regjistrimit të automjeteve në Zubin Potok është djegur gjatë natës nga serbët që banojnë aty. Ky veprim i tyre ka ardhur si pasojë e pakënaqësisë ndaj vendimit të qeverisë kosovare për targat e automjeteve që hyjnë nga Serbia.
Po kështu, ka raportime se edhe në Qendrën e Regjistrimit në Zveçan, serbët kanë hedhur granata dore. Nga ngjarja nuk raportohet që të ketë persona të lënduar.
Ndërkohë Policia e Kosovës ka shkuar në Zubin Potok dhe Zveçan për të vendosur situatën nën kontroll.
Ministri i Punëve të Brendshme Xhelal Sveçla, i ka quajtur ngjarjet akte terroriste.
“Sot ora 01:00 pas mesnate, nga një akt kriminal me elemente terroriste të shkaktuar nga persona të dyshimtë është djegur Qendra e Regjistrimit të Automjeteve e cila gjendet në objektin e komunës në Zubin Potok. Policia e Kosovës ka dalë menjëherë në vendin e ngjarjes dhe së shpejti do të kemi më shumë informata. Po ashtu, është sulmuar edhe Qendra e Regjistrimit Civil në Zveçan ku dyshohet edhe për një mjet shpërthyes”, ka shkruar ai në një postim në rrjetet sociale.
Prej 6 ditësh në veri të Kosovës situata është e tensionuar për shkak të vendimit të qeverisë kosovare për automjetet që hyjnë nga Serbia duhet të pajisen me targa provizore. Të njëjtin rregull, Serbia e aplikon prej kohësh ndaj qytetarëve të Kosovës.
