Një 31-vjeçar është shpallur në kërkim policor pasi në servisin e tij në Lezhë është gjetur një pistoletë.
“Shërbimet e Komisariatit të Policisë Lezhë, në bashkëpunim me forcën e posaçme ‘Shqiponja’ në DVP Lezhë, mbi bazën e informacioneve të siguruara në rrugë policore, se pronari i një servisi në fshatin, Balldre-Lezhë, mbante armë zjarri pa leje, kanë ushtruar kontroll në këtë ambient. Gjatë kontrollit të ushtruar, shërbimet e Policisë gjetën dhe sekuestruan në cilësinë e provës materiale një armë zjarri pistoletë, me krehër me fishekë”, njoftoi policia.
Në vijim të veprimeve, shtuan të njëjtat burime, u bë shpallja në kërkim e pronarit të servisit, shtetasit A.M., 31 vjeç, banues në Balldre, Lezhë, për veprën penale “Armëmbajtja pa leje”, si dhe u procedua penalisht shtetasi E.L., 34 vjeç, punëtor në këtë servis, për veprën penale “Moskallëzimi i krimit”.
Hetimet e mëtejshme për rastin do i kryejë prokuroria e Lezhës.
