Eraldo Vora, banues në fshatin Sallmone të Shijakut, është arrestuar nga policia, pasi gjatë kontrollit të ushtruar në automjetin e tij iu gjet dhe sekuestrua një armë zjarri pistoletë, 1 krehër dhe 10 fishekë.
Policia njoftoi këtë të Hënë se në banesën e 26-vjeçarit, kanë gjetur dhe sekuestruar në cilësinë e provës materiale rreth 14 gr. kokainë, 1 peshore elektronike, një shkop metalik dhe sende të tjera të kundërligjshëm.
Eraldo Vora është volejbollist. Sezonin e kaluar, u aktivizua me skuadrën e Partizanit.
Aksioni
Burime zyrtare nga blutë sqaruan se ata kishin marrë informacion “në rrugë operative” për veprime të paligjshme nga ana e të riut.
“Gjatë kontrollit të ushtruar në automjetin tip “Audi”, me të cilën ky shtetas po qarkullonte, iu gjet dhe sekuestrua një armë zjarri pistoletë, 1 krehër dhe 10 fishekë. Në vijim të kontrollit, në banesën e shtetasit Eraldo Vora, shërbimet e Policisë kanë gjetur dhe sekuestruar në cilësinë e provës materiale rreth 14 gram lëndë narkotike e dyshuar kokainë, 1 peshore elektronike, një shkop metalik dhe sende të tjera të kundërligjshëm. Gjithashtu, në banesën e këtij shtetasi u konstatua lidhje e paligjshme e energjisë elektrike”, njoftoi policia.
Materialet i kaluan Prokurorisë së Rrethit Gjyqësor Durrës, për veprat penale “Armëmbajtja pa leje”, “Mbajtja pa leje e armëve të ftohta”, “Prodhimi dhe shitja e lëndëve narkotike” dhe “Vjedhja e energjisë elektrike”, shtuan të njëjtat burime.
