Përplasjet në PD, ja porosia e Bashës për deputetët

Kreu demokrat Lulzim Basha duket se ka ndryshuar mendim lidhur me debatet që janë thelluar në Partinë Demokratike, pas vendimit të tij, për të përjashtuar ish-Kryeministrin Sali Berisha nga Grupi Parlamentar, duke e argumentuar këtë qëndrim me faktin se ia kishte kërkuar SHBA dhe me ta s´mund të negociohej.

Por ndërsa vendimin e paraqiti si personal dhe në mbledhjen e grupit parlamentar, pak minuta pas bërjes publike të vendimit, Basha kërkoi nga deputetët që të mos përfshiheshin në debate, pasi përgjegjësia ishte e tij, sot në një takim që ka zhvilluar me të paktën 8 deputetë, kreu demokrat u ka kërkuar të mos i shmangen mediave lidhur me çështjen në fjalë.

Në takimin e Bashës ishin të pranishëm Tomor Alizoti, Belind Këlliçi, Ervin Salianji, Alfred Rushaj, Enkelejd Alibeaj, Jorida Tabaku, Agron Gjekmarkaj dhe Gazment Bardhi.

Mësohet se qëllimi i këtij takimi ishte diskutimi lidhur me debatin e nisur në PD, por edhe me hapat që mund të ndërmmerren ndaj ish-Kryeministrit, i cili ka shtuar akuzat në drejtim të Bashës, duke e cilësuar një vegël të Ramës, i cili mund t´a blejë dhe shesë kreun e PD, por jo demokratët.

LEXO EDHE  Rrahu dhe bëri për spital gruan, arrestohet turisti në Ksamil

Sipas raportimeve, mësohet se kryedemokrati u ka dhënë porosi deputetëve që të mos i shmangen mediave lidhur me çështjen e përjashtimit të Berishës.

Berisha ka paralajmëruar nisjen e një lëvizjeje me qëllim vendosjen në vend të asaj që e konsideron si “respektimi i statutit të PD, rikthimi i kësaj partie në respektimin e parimeve dhe vlerave”.

Deri më tani kreu demokrat ka zhvilluar një takim me drejtuesit e degëve të PD, me Grupin Parlamentar dhe me Kryesinë, ndërkohë që nuk dihet se çfarë rrjedhe mund të marrin zhvillimet në partinë më të madhe të opozitës.