Ish-Kryeministri Sali Berisha u shpreh mbrëmjen e sotme se është anëtar i Grupit Parlamentar të PD. Berisha tha se KQZ i ka dhënë mandatin e deputetit si pjesë e Grupit Parlamentar të PD.
“Në 25 prill ishte kandidat i PD, KQZ më konfirmoi si deputet i PD dhe unë jam deklaruar si deputet i Partisë Demokratike.
Deputeti nuk mund të përjashtohet nga Grupi Parlamentar me një deklaratë të Kryetarit të PD, i cili shkeli statusin e partisë. Në statut parashikohet që përjashtimi ndodh nëse Këshilli Kombëtar voton me 2/3 e votave, ndërkohë që Kryetari shkarkohet me 50+1 % të votave”, tha Berisha.
Ish-Kryeministri tha se kjo është arsyeja pse deklarata e Bashës s´ka asnjë vlerë, ndërsa shtoi se aktualisht PD është në një rrezik të madh.
Berisha tha se po bën ç´është e mundur që nga ky proces është që PD të dalë më e fortë dhe më e madhe.
“Lulzim Basha e dinte shumë mirë se po ta çonte për votim propozimin do i rrëzohej dhe ai duhej të jepte dorëheqjen”, tha Berisha.
