Një 36-vjeçar i shpallur në kërkim ndërkombëtar për veprën penale “Shtrëngimi me anë të kanosjes ose dhunës për dhënien e pasurisë”, është ekstraduar nga Italia drejt Shqipërisë, pas arrestimit në vendin fqinjë.
“Falë bashkëpunimit të Interpol Tirana me Interpol Roma/Itali, për lokalizimin dhe kapjen e personave të shpallur në kërkim ndërkombëtar, është bërë i mundur lokalizimi, kapja dhe arrestimi në Itali, me qëllim ekstradimi vendit tonë, i shtetasit shqiptar: Behar Aliaj, 36 vjeç, banues në Fier. Ky shtetas ishte shpallur në kërkim, pasi Gjykata e Shkallës së Parë për Krimet e Rënda Tiranë, me vendimin e datës 24.05.2018 i ka caktuar masën e sigurisë ‘Arrest në burg’, për veprën penale ’shtrëngimi me anë të kanosjes ose dhunës për dhënien e pasurisë’””, njoftoi policia.
Të njëjtat burime sqaruan se më datë 24.03.2017, në vendin e quajtur “Sheq i Madh”-Fier, Behar Aliaj dyshohet se ka shtrënguar me anë të kanosjes ose dhunës shtetasin E.B., duke e kërcënuar se do ta vriste nëse ai nuk do t’i jepte 10.000 euro brenda dy muajve.
