Tre persona janë arrestuar nga policia e Durrësit pas dyshimeve nga policia se do të kryenin një vrasje kundrejt pagesës. Gjatë një ndjekje policore, ata akuzohet se kanë goditur me automjetin që lëviznin, makinën e bluve.
Në pranga janë vënë pasditen e djeshme:
- Aldi Mustafa, 35 vjeç, banues në Durrës, i dënuar më parë për veprat penale “Kanosja” dhe “Prodhimi dhe shitja e narkotikëve”, i dënuar më parë me 10 vite burg, në Gjermani;
- Uran Zyka, 40 vjeç, banues në Durrës, i dënuar më parë për veprën penale “Kanosja”. Të dy këta shtetas janë me precedent të theksuar kriminal në fushën e krimeve ndaj personit.
- Tahir Gjinika, 33 vjeç, banues në Durrës.
Aksioni
Aksioni për ndalimin e tyre i koduar “Misioni” erdhi “pas informacioneve të siguruara nga strukturat e Komisariatit të Policisë Durrës”, sqaruan burime zyrtare.
“Këta shtetas qarkullonin në lagjen nr.15-Durrës, me mjetin tip ‘BMW’, me drejtues Aldi Mustafan. Në momentin e ndërhyrjes nga shërbimet e Policisë, të tre shtetasit kanë tentuar të largohen duke goditur mjetin e shërbimit të Policisë dhe duke rrezikuar jetën e punonjësve të Policisë që ishin në operacion, por nuk kanë mundur dot pasi janë bllokuar nga mjete dhe shërbime të tjera të Policisë.
Gjatë kontrollit të ushtruar në mjet u gjetën: 3 armë zjarri pistoletë me fishekë në fole, 1 armë zjarri mitraloz me fishekë në fole gati për qitje, municion luftarak, 2 laptopë, 9 telefona celularë dhe 1600 euro, të cilat u sekuestruan në cilësinë e provës materiale së bashku me automjetin”, njoftoi policia.
Hetimet e mëtejshme për rastin do të kryhen nga prokuroria e Durrësit.
Ndërkohë, policia ka ngritur ndaj të arrestuarve vetëm akuzën e armëmbajtjes pa leje.
