Prezantohet Laroshi: Partizani ekipi më i madh në Shqipëri, synoj vendin e titullarit

Portieri Vokli Laroshi u zyrtarizua si lojtari më i ri i Partizanit dhe për “Panorama Sport”, tha fjalët e para si lojtar i kuq. Gardiani i Shpresave U-21 theksoi se do të japë maksimumin për Partizanin, si dhe pohoi se Alban Hoxha është shembull për t’u ndjekur. Gjithashtu, tregoi edhe arsyen pse zgjodhi “demat”, duke u shprehur:

“U bëra pjesë e Partizanit, sepse është ekipi më i madh në Shqipëri. E kam pasur ëndërr që në fëmijëri që të isha pjesë e këtij klubi. Kam qenë pjesë e grupit për disa kohë dhe jam ndier shumë mirë aty, prandaj vendosa që të firmos”, tha fillimisht Laroshi.

Më herët, pësuat edhe një dëmtim në stërvitje, ende pa u zyrtarizuar në klub. Menduat se pas atij dëmtimi, gjërat nuk do të ecin në rrugën e duhur te Partizani?

Jo, thjesht është diçka pjesë e stërvitjes. Në futboll ndodh që të dëmtohesh, por kjo gjë nuk më bëri të besoja se nuk qenka e shkruar të jem pjesë e këtij klubi, madje më motivoi edhe më shumë që të jepja maksimumin e që të rikthehesha edhe më i fortë.

LEXO EDHE  Inter-Atalanta mbyllet në barazim, Milani mban kreun e Seria A

Te Partizani, Alban Hoxha është flamuri i ekipit. Pse zgjodhët Partizanin, duke e ditur që Hoxha është portieri titullar i padiskutueshëm?

Unë e kam ego personale që të jem gjithmonë titullar edhe të luftoj shumë që të jem numri 1. Me veten time e kam garën, që të stërvitem sa më shumë, të jem në maksimumin tim dhe në nivelin e duhur.

Keni biseduar me trajnerin Daja, ju ka treguar planet që ai ka për ju?

Kemi pasur biseda me profesor Dajën, biseda nga afër. Vendimi për të luajtur i takon atij dhe ai është i pari i kësaj pune. Ajo që duhet të bëj unë, është puna ime, të stërvitem dhe të jem në maksimum. Shumë ju cilësojnë si pasardhësi i Alban Hoxhës. Si ndiheni? Kur dëgjoj këto fjalë, ndihem shumë krenar dhe i falënderoj që më vlerësojnë kaq shumë. Alban Hoxha ka qenë idhulli im që i vogël, jemi edhe nga i njëjti qytet. Kemi shumë cilësi të përbashkëta dhe mendoj se është shembulli i duhur për t’u ndjekur, pasi i ka dhënë shumë futbollit shqiptar./Panoramasport