Një rrëfim prekës ka ardhur nga një grua afgane, e cila aktualisht është e sigurt në Shqipëri, bashkë me familjen e saj. Ghazaal Habibyar ka treguar se pavarësisht se jeta e saj është e sigurt, mendjen e ka gjithmonë në Afganistan.
Sipas saj, atje ka lënë familjen e saj të gjërë, por edhe bashkëkombësit e saj, të cilët janë në rrezik nga talebanët. 38-vjeçarja ka treguar se pak para se të hipnin në aeroplan të enjten, ata dëgjuan “aq shumë zhurmë në ajër” sa u tha se fluturimi mund të anulohej.
Pas 40 minutash, ata u vendosën në bordin e aeroplanit, i cili u ngrit në një mënyrë të frikshme vertikale për të shmangur të shtënat. “Ka raste në jetën tuaj kur ndiheni fajtorë që jeni gjallë. Kjo mund të kishim qenë ne. Ata njerëz që kanë humbur jetën, kanë familje, janë njerëz shumë të rinj”, tha ajo.
Në fjalën e saj, 38-vjeçarja kritikoi mënyrën se si SHBA dhe NATO u larguan nga vendi. “Kjo katastrofë, kjo katastrofë njerëzore që po ndodh tani, mund të ishte parandaluar. I gjithë ky proces evakuimi mund të ishte menaxhuar shumë më mirë”, mendon ajo.
Habibyar nuk është e sigurt për atë që do t’i ofrojë e ardhmja e afërt, duke thënë se “do të na duhet shumë kohë që të shërohemi psikologjikisht, mendërisht, emocionalisht nga gjithçka që kemi kaluar”. Asaj i mungon kryeqyteti afgan, Kabuli, “frutat në anë të rrugës që kaloja kur shkoja në zyrë” dhe tingujt e zogjve në mëngjes.
Dhe Habibyar i bëri një kërkesë djalit të saj kur aeroplani u ngrit. Hamza, 6 vjeç, ishte duke qarë dhe nuk donte të largohej. “Unë i thashë se do të më bësh një premtim: të studiosh, të jesh dikush dhe të kthehesh (në Afganistan)”, ka thënë ajo. /Telegrafi/
