Një person i shpallur në kërkim nga autoritet shqiptare për një ngjarje të ndodhur në vitin 1997 është arrestuar në Greqi e më pas është ekstraduar drejt vendit tonë.
“Nga Zyra Qendrore Interpol Tirana u krye ekstradimi nga Greqia drejt vendit tonë, i shtetasit shqiptar Fatos Muçi, 44 vjeç, banues në Tepelenë. Gjykata e Rrethit Gjyqësor Fier, në vitin 2009, ka caktuar masën e sigurisë ‘Arrest në burg’, për veprën penale ‘Vrasje’, ‘Vjedhje me armë’ dhe ‘Armëmbajtje pa leje’. Personi i ekstraduar në PKK Rinas, iu dorëzua Drejtorisë së Përgjithshme të Burgjeve”, njoftoi policia këtë të Diel.
Referuar dosjes hetimore të paraqitur në gjykatë për Muçin, ai akuzohet se në bashkëpunim me dy persona të tjerë kanë grabitur disa persona që udhëtonin me makinë në Mallakastër dhe kanë qëlluar me armë ndaj mjetit. Për pasojë, një person humbi jetën.
Çështja ka kaluar deri në Gjykatën e Lartë, që vë vitin 2014 ka dhënë vendim për rigjykimin e dosjes në Apelin e Vlorës. Nga një kërkim në faqen online të Gjykatës së Apelit Vlorë, nuk ka të dhëna për hetimin. Ndërkohë, policia konfirmon se arrestimi i Muçit u bë pasi ndaj tij rëndon masa e “arrestit me burg”, dhënë nga Gjykata e Fierit, në vitin 2009.
