Tre persona janë vënë në pranga në Lushnje, si pjesë e “një grup të rrezikshëm që kryente vjedhje të parave dhe sendeve me vlerë në banesa dhe biznese”, njoftoi këtë të Shtunë Policia lokale.
Në pranga u vunë Niko Zaimi, 36 vjeç, i dënuar më parë për vjedhje, Erion Kondi, 40 vjeç dhe Klaudjo Myrtja, 27 vjeç, të tre banues në Fier.
Arrestimi
Shërbimet e Komisariatit të Policisë Lushnjë, pas njoftimit të marrë se në orët e para të mëngjesit ishin vjedhur 2 biznese dhe 1 banesë në Lushnjë, organizuan dhe finalizuan operacionin e koduar “Trio”, duke arrestuar tre personat e sipërpërmendur, sqaroi policia.
Të njëjtat burime shtuan se, këta shtetas, në bashkëpunim me njëri tjetrin, gjatë orëve të para të mëngjesit në lagjen “Kadri Qystri” kanë vjedhur biznesin në pronësi të shtetasit D.Sh., në lagjen “Loni Dhamo” kanë vjedhur banesën e shtetases N.K. dhe në lagjen “Kadri Qystri” kanë tentuar të vjedhin biznesin në pronësi të shtetasit A.S.
Nga tërësia e veprimeve hetimore ka rezultuar se gjatë muajit maj dhe gusht, ata kanë vjedhur sende me vlerë, shuma parash dhe orendi shtëpiake në 3 banesa, konkretisht në datën 11.05.2021 kanë vjedhur banesën e shtetasit J. P., në datë 10.08.2021 kanë vjedhur banesën e shtetasit E. E., dhe në datë 12.08.2021 kanë vjedhur banesën e shtetasit A. H.
Gjatë operacionit, Policia ka bërë sekuestrimin e shumës prej 3830 euro, 40 paund, 125.200 lekë të rinj, disa bizhuteri, 3 aparate celularë, pajisje që përdoreshin nga autorët për të kryer vjedhjet si dhe automjeti i cili gjithashtu përdorej nga këta shtetas për të kryer vjedhjet.
“Vijon puna për dokumentimin e rasteve të tjera të vjedhjeve të kryera nga këta shtetas, ndërsa materialet i kaluan Prokurorisë pranë Gjykatës së Shkallës së Parë Lushnjë, për veprën penale ‘Vjedhja’ e kryer në bashkëpunim”, thuhet në njoftimin e policisë.
