Një tjetër grup me refugjatë afganë ka zbarkuar në aeroportin e Rinasit orët e para të mëngjesit, pas dy fluturimeve të djeshme. Burra, gra, fëmijë, të rinj e të moshuar u panë të zbrisnin nga avioni në aeroportin, nga pamjet e publikuara nga kryeministri Edi Rama. Kreu i qeverisë, ministrja e Mbrojtjes, Olta Xhaçka e ambasadorja amerikane Yuri Kim u shfaqën po ashtu.
Rama konfirmoi se deri më tani 275 emigrantë kanë mbërritur në Shqipëri, ndërsa më herët ka deklaruar se Shqipëria do të strehojë përkohësisht rreth 4000 të tillë. Emigrantët janë strehuar një pjesë në hotele në Durrës dhe një pjesë në Qytetin Studenti.
“Një pjesë e madhe janë veprimtarë të shoqërisë civile, përgjithësisht gra që kanë qenë shumë të zëshme për të drejtat e grave në Afganistan dhe janë një kategori që janë shumë të rrezikuara nga talibanët sot. Një pjesë e madhe janë dhe studentë, veçanërisht te ky grup, por kemi pasur dhe disa studentë të grupi i mëparshëm prej 95 vetave”, tha ministrja Xhaçka.
“Tani do ti çojmë atje ku do ti akomodojmë dhe atje do ti kenë të gjitha shërbimet edhe ato shëndetësore edhe gjithë procedimin përmes policisë dhe çdo nevojë tjetër që do të kenë”, shtoi ajo.
Xhaçka, e cila po koordinon strehimin e emigrantëve, bëri me dije se “derisa të lirohen strukturat hoteliere nga piku i sezonit turistik, grupet e tjera të afganëve, që do të vijnë në vazhdim, do të strehohen për pak ditë në konviktet e Qytetit Studenti”.
