Ergys Verdho fillon lojën me tenderat edhe në KESH

Nga BoldNews.al

Ergys Verdho, pasi e “ndriti” në Autoritetin Rrugor Shqiptar, ka kaluar prej disa muajsh te KESH-i. Një tjetër kompani shtetërore me para me “thasë”. Verdho, që ka bekimin e Ballukut, ka vijuar edhe në këtë institucion të bëjë tendera.

Nga procedurat më të majme të bëra nga institucionet shtetërore. Nga ato të dyshimtat që bënte dikur te ARRSH-ja, por që deri më tani ia hodhi.

Verdho mbahet mënd për dhjetëra tendera të majmë, ku i vendosi vulën edhe rritjes 10-fsh të kostove të ndërtimit të rrugëve. Po te KESH-i? Të njëjtën gjë, po kësaj herë po luan me procedura të dyshimta.

BoldNews.al ka siguruar dokumentet e një tënderi të kryer nga KESH-i i Verdhos, i cili ka s’kualifikuar kompaninë që ofroi më pak. Bëhet fjalë për firmën në pronësi të familjes së deputetit Sadri Abazi, i cili pas tërheqjes nga politika, po i humb radhazi edhe tenderat, megjithëse kjo kompani ka ofruar më pak.

Sipas dokumenteve që disponon BoldNews.al, Verdho ka shpallur fituesin e tenderit “mbrojtja e kullave të ekuilibrit nga çarja e shkëmbinjve mbi to. Mbrojtja dhe sistemimi nga rrëshqitja e koluvioneve me Hec Koman” thuhet në dokumentet e këtij tenderi.

LEXO EDHE  Ja kategoria e studentëve që mund të frekuentojë aditoret edhe pa vaksinë

Fondi limit për këtë tender ka qenë plot 369,639,401 lekë pa TVSH, ose me TVSH rreth 4 milionë euro. Burimi i financimit është me të ardhurat e KESH-it, ndërsa afati për kryerjen e punëve ishte vetëm 4 muaj. Në tender ka marrë pjesë firma “Alko Impex General Constuction” me ofertë 329,041,784.80 lekë pa TVSH. Dhe bashkimi i operatorëve ekonomik “SMO Vataksi” dhe “SMO Union” me vlerë të ofertës ekonomike 329,790,595.59 lekë pa TVSH.

Alko Impex ka ofruar rreth 700 mijë lekë më pak sesa SMO, ndërsa kjo e fundit është shpallur fituese e tenderit. Verdho ka s’kualifikuar Alko Impex me arsyetimin se s’ka punonjës të certifikuar të punojnë në lartësi. Gjithashtu, dy kompanitë Alko Impex të Arbër Abazit s’kanë ndarë se çfarë do të bënte njëra apo tjetra.

Ndërkohë, arsye tjetër ishte se s’ka punë të ngjashme. Duket se pushteti luan një rol thelbësor në fitimin e tenderëve. Disa muaj më parë, asnjë institucion nuk e s’kualifikonte këtë firmë. Tani, pas tërheqjes së Sadriut nga politika, firma është tërhequr në disa tender që ka fituar dhe është përjashtuar nga disa të tjerë.