I dyshuari kryesor për vrasjen e 18-vjeçares Marigona Osmani në Ferizaj të Kosovës, 29-vjeçari Dardan Krivaqa është liruar në vitin 2012 dhe 2017 tre muaj përpara se të përfundonte dënimin.
Sipas një raporti të siguruar nga mediat, rezulton se këto vendime janë marrë nga drejtorët e burgut të Gjilanit dhe Dubravës dhe janë konfirmuar dhe nga ana e Ministrisë së Drejtësisë së Kosovës.
“Personi në fjalë është pranuar në QP në Gjilan më 21.10.2012, ku ishte i dënuar me dy vite e pesë muaj për veprën penale, Vjedhje e rëndë dhe armëmbajtje pa leje”, thuhet në përgjigjen e Ministrisë së Drejtësisë.
“Pas ankesës në Gjykatën Supreme, të njëjtit i është ulur dënimi në dy vite. Po ashtu, sipas Nenit 127 të Ligjit të vjetër për Ekzekutimin e Sanksioneve Penale, i njëjti, ka përfituar tre muaj lirim të parakohshëm dhe është liruar më 17.08.2012 nga QP Gjilan” thuhet në përgjigjen e Ministrisë së Drejtësisë.
Ministria tregon se Krivaqa ishte burgosur përsëri pak muaj më vonë dhe ishte dërguar në qendrën e Dubravës.
“I njëjti, sipas Nenit 127 të Ligjit të vjetër për Ekzekutimin e Sanksioneve Penale, më 28.04.2017 është liruar nga QK Dubravë tre muaj më herët me Lirim të Parakohshëm” thuhet në përgjigjën e Ministrisë së Drejtësisë.
Dardan Krivaqa, ish-bashkëshorti i 18-vjeçares është autori kryesor i vrasjes së saj në Ferizaj. Sipas autoriteteve kosovare, ai e ka dhunuar për dy ditë me radhë dhe më pas e la të pajetë në derën e Spitalit të Ferizajt.
Ministri i Brendshëm deklaroi se mbi Krivaqën rëndojnë 160 vepra penale ndërkohë që sipas mediave kosovare, kishte ende 10 procese gjyqësore të pambyllura. Lirimi para kohe nga burgu, vërteton edhe njëherë atë çka deklaroi ministri, se Krivaqa i ka shpëtuar drejtësisë pasi ka pasur mbrojtje nga persona me pushtet.
