Rasti tragjik i Marigona Osmanit, që u dhunua për vdekje nga bashkëshorti i saj, Dardan Krivaqa, ka tronditur gjithë opinionin publik. Në lidhje me ngjarjen ka folur së fundmi edhe xhaxhai i 18-vjeçares së ndjerë.
Në një prononcim për mediat, xhaxhai i së ndjerës është shprehur se ajo që i është bërë mbesës së tij nuk mund t’i bëhet as hasmit. Ai ka treguar se kufoma ka pasur shumë shenja në fytyrë e trup dhe dukej si ndonjë film horror.
“Sot kur e pamë kufomën, fytyrën e saj dhe trupin se çka i kishte bërë ai, unë s’do mundesha t’ia bëja as hasmit e lëre më personit që e kam në shtrat.
Kishte shumë shenja në fytyrë, në gjunjë, e rrahur, e dhunuar, shumë e sulmuar, dukej si horror. Ai ka qenë sigurisht në ndikim të alkoolit e drogës, sepse njeriu normal nuk mund ta sjellë dikë në atë gjendje”, deklaroi Remzi Osmani.
Ai ka shtuar se shpreson që drejtësia të funksionojë dhe autori të marrë dënimin e merituar.
“Edhe nëse do ta lironin nga burgu nesër, prapë nuk jemi pishman, sepse në Kosovë kemi dy drejtësi, është ajo ligjore dhe ajo e kanunit. Nuk është e lehtë për ne, është dhimbje e madhe ajo që na ndodhi”, është shprehur ai.
