Transferimi i Esat Malës te Giresunspori ka rezultuar blof, pasi turqit nuk e kanë federuar ish-mesfushorin e Partizanit për sezonin e ri, ndonëse e patën prezantuar më 8 korrik. Me sa duket turqit nuk janë bindur sa duhet nga 22-vjecari.
Për disa javë ai u stërvit me Giresunsporin, si dhe luajti edhe ndeshje miqësore. Para fillimit të kampionatit, Mala është njoftuar nga klubi që të gjejë ekip të ri, pasi nuk do të ishte pjesë e Giresunsporit në Superligën turke. Ndonëse Esat Mala u largua si lojtar i lirë, Partizani nuk do të dilte pa gjë nga ky transferim, pasi “demat” prisnin të arkëtonin rreth 150 mijë euro si taksë kompensimi për formimin e lojtarit. Kështu që, Giresunspori bëri “pazar” me Partizanin në lidhje me këtë shumë dhe në fund u arrit formula e kalimit të 22-vjeçarit, ku të kuqtë do të përfitonin 100 mijë euro, si dhe do të mbanin 10% të vlerës së kartonit të Malës.
Me dështimin e këtij transferimi, kur dihet se Partizani nuk i ka arkëtuar 100 mijë eurot nga klubi turk i sapongjitur në Superligë, vëmendja e kryeqytetasve spostohet sërish nga ish-mesfushori i tyre. Merkatos së verës po i vjen fundi, kështu që Partizani i mban sytë nga Mala duke vlerësuar dy opsione, kompensim financiar ose rikthim si përforcim në radhët e ekipit. Të dy variantet janë të mirëpritur nga “demat”. Në fakt, stafi i ka bërë llogaritë e sezonit të ri pa praninë e 22- vjeçarit, kështu “hyzmetin” po ia bëjnë kompensimit. Çdo ekip që do të kërkojë shërbimet e mesfushorit kosovar për sezonin e ri, duhet të bashkëpunojë edhe me Partizanin, që ka të drejtën e arkëtimit të taksës së formimit të lojtarit.
Por edhe rikthimi do të ishte i mirëpritur për trajnerin Daja, pasi bëhet fjalë për një lojtar polivalent që mund të mbulojë disa role, nga mbrojtës i djathtë, në mesfushor dhe sulmues krahu. Në fakt stafi teknik dhe ai drejtues po e kërkon një lojtar me të dhënat e Malës, kryesisht për krahët. Nëse 22-vjeçri do të rikthehej, Partizani do ta mirëpriste duke i ofruar edhe një kontratë të favorshme, ashtu siç ia prezantuan para ikjes për në Turqi. Madje, para largimit nga “demat” u përfol se në rast se Mala nuk gjen ekip jashtë vendit, do të rinovonte me Partizanin, por me një kusht… që të mos llogaritej dhe aktivizohej si mbrojtës i djathtë. Me rikthimin e Malës dhe zyrtarizimin e Masanga Matondo i bie që Partizani të mendojë vetëm për një qendërsulmues në merkato./Panoramasport
