Nga Boldnews.al
E kush e mendonte se do të ndodhte, si u hap qielli dhe ra kjo rrufe, mu bash në mes të vapës? Erion Braçe, nuk do të jetë më nënkryeministër, një post të madh që e mbante në shpinën e tij të brishtë që nga dhjetori i vitit 2018. Ai u përlot kur Rama i thirri emrin si zëvendëskryeministër, edhe pa e pyetur fare. “Ka një fund! I nderuar që shërbeva për njerëzit në nevojë, në ditët e tyre më të vështira në 24 vitet e fundit”-shkruan Braçe.
Nga sot e në vijim do na mungojë, ndaj e qara është pak, ndoshta edhe çjerrja e faqeve dhe klithjet e shpirtit nuk mjaftojnë për këtë largim. Ai vërtetë ishte nënkryeministër, por në mungesë të Ramës që përtonte të bënte mbledhjet, apo ishte i zënë me postimet në Facebook, Braçe ka bërë rolin e kreut të qeverisë, pasi vetë Rama ia kishte besuar vulën dhe firmën nga një autorizim i lëshuar. Dhe ata, oligarkia janë “njerëz në nevojë” pasi u nevojiten qindra milionë euro nga buxheti i shtetit në konçesione, të cilat në fund ndaheshin aq “drejt” sa disa shkonin edhe për fushatën e pushtetit. Dhe Braçe ishte aty për këta “njërëz në nevojë”.
Me firmën e Braçes janë disa vendime të dyshimta të qeverisë që lidhen me benefitet që përfitonte aligarkia. Por sërish Braçen e kishim “zë qytetar”, kur nxirrte kokën në ballkon dhe shihte sesi i prishnin pllakat e trotuarit poshtë shtëpisë, apo si Erion Veliaj në gjysmë të natës i çonte ekskavatorët duke e ngritur të trembur nga gjumi. Por ai nuk ia përtonte, ankohej pafund në Facebook, duke nxjerrë inatin e madh, ndonëse mbante postin e madh të nënkryeministrit.
Qani e çirruni, sidomos ju fqinjët e Braçes, sepse Lali Eri tashmë që nuk e ka këtë “zë të fuqishëm” do ju çojë në mes të natës jo vetëm ekskavatorët që gërmojnë, por do rreshtojë edhe betonieret e oligarkisë që ta shpërthejnë betonin mu në prag të dritares.
Do qajnë edhe në Lushnje, sidomos pas ikjes së dy “ikonave të qytetit”, i pari kryebashkiaku Fatos Tushe që u arrestua për një tender për hapje kanalesh dhe tashmë edhe “B-ja” i tyre, Erion Braçe, që do jetë deputet, por jo më nënkryeministër.
Po do mungojë zëri buçitës edhe nëpër sallat e gjykatave dhe në dyart e drejtësisë, ku u sulej prokurorëve dhe gjyqtarëve duke mbrojtur nëpunësit e Kadastrave. Nuk do jetë më aq aktiv edhe në Divjakë ku shalqit kalben në ara, por Braçja u jepte kurajo, ndonëse tregu i produkteve bujqësore kontrollohet nga duart e errëta të njerëzve të krimit që mbanin në xhep vulat e pushtetit. Braçe nuk do të jetë më ai i madhi, numri dy i qeverisjes së Rilindjes!
