Talebanët në çdo ditë që kalon, shkelin premtimet që dhanë në fillim kur mori Afganistanin nën kontroll. Mediat vazhdojnë të sulmohen nga ushtarët talebanë. Kështu ka bërë me dije organizata “Reporterët pa Kufij”, ku thekson se kufizimet e rënda dhe rregullat përkeqësohen çdo ditë.
Të paktën 10 gazetarë janë kërcënuar ose sulmuar gjatë kryerjes së punës së tyre në rrugët e Kabulit dhe Xhalalabadit brenda një jave, tha organizata, duke shtuar se rreth 100 media private në të gjithë vendin ndaluan punën e tyre sapo talebanët morën kontrollin.
“Gjatë një jave talebanët dhunuan pesë gazetarë dhe kameramanë nga kanali ynë. Kontrollojnë gjithçka që transmetojmë”, citoi organizata një punëtor të një kanali televiziv privat, i cili për arsye të sigurisë foli në kushte anonimiteti.
Ndërkohë, organizata shton se mediat vendase janë detyruar të pezullojnë një pjesë të programeve të tyre sepse talebanët i urdhëruan ata të respektojnë ligjin islam. Korrespondentët e huaj që mbetën në kryeqytet nuk janë subjekt i këtyre rregullave dhe arrijnë të punojnë pothuajse normalisht, por për sa kohë, shtron pyetjen oganizata.
