Një 16-vjeçar me iniciale O.G. ka humbur jetën si pasojë e një aksidenti në aksin Shkodër-Velipojë.
Adoleshenti po drejtonte një mjet bujqësor, kur u përplas nga një mjet tjetër rreth orës 06:00, në vendin e quajtur “Trush i Poshtëm”.
Impakti rezultoi fatal për 16-vjeçarin, i cili humbi jetën.
Rruga ka pasur mjegull të dendur.
Aksidenti
“Rreth orës 06:00, në aksin rrugor Shkodër –Velipojë, në vendin e quajtur ‘Trush i Poshtëm’, shtetasi L.L., banues në lagjen ’10 Korriku’-Shkodër, duke drejtuar mjetin tip ‘Benz’ është përplasur me një mjet bujqësor (motokorrëse) që po dilte nga një rrugë dytësore për në rrugën kryesore dhe për pasojë ka ndërruar jetë drejtuesi i motokorrëses shtetasi O.G. 16 vjeç, banues në fshatin Trush”, njoftoi policia.
Drejtuesi i automjetit tip “Benz” është shoqëruar në ambjetet e DVP Shkodër.
Aksidenti dyshohet të ketë ndodhur për shkak të kushteve atmosferike – mungesës së fushëpamjes si pasojë e mjegullës, ndërsa grupi hetimor ndodhet në vendngjarje dhe vijon punë për sqarimin e rrethanave të aksidentit, shtuan të njëjtat burime.
