Autoritetet shëndetësore në Kosovë kanë regjistruar të Dielën 11 viktima me koronavirus.
Në 24 orët e fundit janë regjistruar edhe 1,682 raste të reja, pas 10,710 testimeve.
Ministria e Shëndetësisë ka njoftuar se më 22 gusht janë shëruar 263 pacientë nga COVID-19, ndërsa raste aktive janë 19,695.
Prej 13 marsit 2020, kur janë regjistruar rastet e para të infektimit, autoritetet shëndetësore në Kosovë kanë regjistruar mbi 125,000 pacientë me këtë virus. Prej tyre 2,315 kanë vdekur.
Në 24 orët e fundit, janë vaksinuar 18,776 persona me Pfizer/BioNTech apo AstraZeenca. Të vaksinuar me të dyja dozat janë 236,405 persona, ndërsa sipas autoriteteve 707,793 vaksina janë dhënë në total në Kosovë.
Shërbimi Spitalor Klinik Universitar i Kosovës (SHSKUK), njoftoi të dielën se në spitalet e përgjithshme në Kosovë, si dhe në klinikat për trajtim të koronavirusit, janë të shtruar 858 pacientë, prej tyre 776 me koronavirus. Sipas SHSKUK-së, 32 pacientë janë në gjendje të rëndë dhe 664 po trajtohen me oksigjenorapi.
Nga 20 gushti, në Kosovë kanë nisur së zbatuari masat e reja për luftim të pandemisë. Ahengjet dhe dasmat janë anuluar, është zvogëluar orari i bizneseve të gastronomisë, si dhe është shtuar kërkesa për dëshmi të vaksinimit për të fituar qasje në një mori aktivitetesh.
