Nga BoldNews.al
Safet Gjici, kryetari i Bashkisë së Kukësit, ka ofenduar rëndë banorët e dy lagjeve të reja në bashkinë që drejton.
Një tender me objekt “ujë për të varfrit” është duke u zhvilluar nga Ujësjellësi i Bashkisë, duke diskriminuar rëndë këta banorë. Por, nëse Gjici e cilëson në këtë mënyrë tenderin, po Bashkia e Durrësit si duhet ta cilësojë furnizimin me ujë të vilave në Gjirin e Lalzit?! Ujë për të pasurit! Apo Bashkia e Himarës, që bën herë pas here tendera për vilat në Green Coast, apo për fshatrat e tjerë turistikë në atë zonë? Edhe Jorgoja duhet t’i emërtojë ujë për të pasurit?! Uji është jetë.
Është jetësor për të varfrit dhe të pasurit. Dallimi bëhet nga uji që konsumohet. Këta banorët e lagjeve të pasura nuk e pinë nga rubinetat. Por, nga markat më të shtrenjta botërore. Por, përse Gjici i bën këto cilësime? A nuk kanë pasur të drejtë këta banorë që të kenë në rubineta ujë. Për të larë, shpëlarë apo për gatim. Madje, edhe për ta konsumuar?!
Sipas dokumenteve që disponon BoldNews.al, Ujësjellës Kanalizime Kukës ka hapur një tender “projekt, ujë për të varfër”. Ndërkohë, që e cilëson “për lagjet Kampi Italian dhe Kodër Lumë”. Fondi limit është 64 milionë lekë të vjetra pa TVSH, ndërkohë afati për zbatimin e saj është për 15 ditë. Në dokumente thuhet se është një financim nga GIZ Albania, por sipas hulumtimit të BoldNews.al, nuk bëhet fjalë për projekt “ujë për të varfër”, por për mbështetje të bashkive pas situatës Covid.
Në dokumentet e tenderit thuhet se këto lagje “janë të reja”, ndërsa ish-Kampi Italian në Kukës ka filluar të zhvillohet në vitin 2001. Ndërsa lagjja e te, Kodër Lumë, në vitin 2004.
“Në 5 vitet e fundit në këto lagje janë ndërtuar shumë banesa familjare të cilat kryesisht kanë ardhur nga zonat përreth”, thuhet në dokumentet e bashkisë. Sipas saj, këto lagje janë në kuotën më të lartë se shtrirja e Kukësit dhe furnizohen vetëm kur nuk furnizohet qyteti. Bashkia shkruan në dokumente se “me ndërtimin e këtij rrjeti shpërndarës, banorëve të lagjeve u plotësohet një nga kërkesat më të domosdoshme jetësore dhe do të përmirësohet ndjeshëm niveli i jetesës në këto lagje”.
