Komplikohet dita-ditës situata në të cilën ndodhet Cristiano Ronaldo te Juventus. Portugezi nuk është më në qendër të projektit të bardhezinjve. Stërvitet dhe buzëqesh, megjithatë Massimiliano Allegri vijon të provojë alternativa të ndryshme që nuk përfshijnë impenjimin e Ronaldos.
Një verë mëse e çuditshme për 36-vjeçarin, i cili tashmë kërkon të largohet nga Torino dhe të gjejë një skuadër të re, por diçka e tillë duket e pamundur në këtë pikë të merkatos për agjentin e tij, Jorge Mendes.
Ronaldo e ka kuptuar që Juventus nuk varet më prej tij dhe për këtë arsye dëshiron të ndërrojë ambjent, por nuk ka asnjë skuadër për momentin që të garatojë pagën që CR7 pretendon. Paris Saint German do të mund të realizonte një operacion të tillë veç në rast largimi të Mbappe te Real, gjë që duket e pamundur, të paktën këtë vit.
Në miqësoren me skuadrën e 23-vjeçarëve, Ronaldo ndoqi një program të personalizuar dhe më pas u vendos si spektator në stadium, ndërkohë që këtë të dielë, gjasat janë të pakta për ta parë në fushë, në ndeshjen e javës së parë të Serie A, kundër Udinese.